Leviticus 18
Naha Ni Ramai a Naro na Molenga
1E BAKOVI DAGI i takia e Moses, 2ge taki e huriki a Israel, ge ta maea, “Iau kunana e BAKOVI DAGI, a Vure ne mua. 3Hosi mu made na robo e Egipto, pali naha ni ramai a maka narone ria. Ngane ga taparaki mua lakea na malala e Kenan, pali naha ni ramai a narone ria, a vinara ne ria. 4Mu ramai kunana a vinara nau, mu rata kunana a maki a taki mua vona mu gu rata. Iau e BAKOVI DAGI a Vure ne mua, a habi ne mua a ngava nga. 5 aMu rata lobo a vilo kamumu a ngaru mu gu rata, mu ramai a maka vinara a habi ne mua. E rei a viri i rata maea, bara i made kamumu. Iau e BAKOVI DAGI a takia a ngava iea.6“Iau e BAKOVI DAGI a habi ne mua a vinara nga: Naha ni masigoro ni mahita turana, ni parangi vona tara ngatavine na kabu vomu. Ra naro maea, i muma hateka.
7“Naha ni mahita turane kinamu. Bara o rata mavonga, o vakamaruhu e tamamu.
8 b“Naha ni mahita turana a ngatavine i parangi tabu vona e tamamu. Bara o rata mavonga, o vakamaruhu e tamamu.
9 c“Naha ni mahita turane kurabamu, o e tune tamamu ngatavine, o e tune kinamu ngatavine. Ra ngatavine nga e kurabamu. I made na ruma vomu, o i made na tabeke tara, ia e kurabamu kunana.
10“Naha ni mahita turana e tubumu ngatavine, re tune tumu bakovi a ngatavine, e tune tumu ngatavine a ngatavine. Ra naro iea bara i rata ioe o maruhu hateka.
11“Naha ni mahita turane tune girihine tamamu ngatavine, a vuhuna ia e tune tamamu. Ra ngatavine iea e kurabamu.
12 d“Naha ni mahita turana e kurabane tamamu, a vuhuna ia e balomu.
13“Naha ni mahita turana e kinamu tara, a vuhuna ia a viri vomu.
14“Naha ni mahita turana e girihine tamamu tara, a vuhuna ra ngatavine iea e kinamu. Bara o mahita turana, o rata e tamamu tara i maruhu.
15 e“Naha ni mahita turana e girihine tumu bakovi, a vuhuna ia e kamu.
16 f“Naha ni mahita turana e girihine turamu, a vuhuna ia e kua vomu. Ioe bara o rata mavonga, bara o vakamaruhu e turamu.
17 g“Naha ni mahita turana a ngatavine, turana e tuna a ngatavine. Naha ni mahita turana e tubumu, a vuhuna ia e tubumu. A naro iea i muma hateka.
18“Naha ni parangi tabu e tarine girihimu na tahuna i tababana ni mahuri e girihimu, ma go rata rua ru gu vatahate mule ne rua. Ra naro iea i uka ma i kamumu.
19 h“Naha ni mahita turana a ngatavine i matai a keva, a vuhuna na tahuna iea i muto.
20 i“Naha ni mahita turana e girihina bakovi i made tabukoi vomu, bara o rata mavonga o muto.
21 j“Naha ni habi e tune mua ne Molek. ▼ Bara mu rata mavonga, mu vakahale a rana Vure ne mua. Iau e BAKOVI DAGI a takia a ngava iea.
22 l“Naha ni mahita turana a bakovi tara i manga a naro ni mahita turana ngatavine. Ra naro iea i muma hateka.
23 m“Naha ni tari a ligo, a boro, a maki maea. A ngatavine tara nahea ge rata mavonga. Ra naro iea i muma hateka, i rata a viri i muto na matagu.
24“Naha ni rata a maka naro hale nga, ma mu gu muto na matagu. E huriki i uka ma ri lohoka na Vure muholi, ri made na robo e Kenan, ri rata a maka naro hale nga, ri muto na matagu. I mavonga a vakatubu ni lili tala ria, mu gu bole a malala ne ria. 25A naro hale ne ria i ratea a malala iea i muto. Lakea a rata halea a malala ne ria, i marikoi ne ria, i lua tala ria. 26Pali mua turana e huriki a mosi ri made turane mua, mu ramai a maka vinara nau a habi ne mua. Naha ni ramai a narone huriki ri made muga na robo iea, a vuhuna a narone ria i mavuru hateka, a marikoi vona. 27Mu lohoka vona e huriki ri made muga vona a robo iea, a narone ria i mavuru, i ratea a malala i muto. 28Naha ni rata mavonga. Mua bara mu rata mavonga, a malala bara i lua tala mua i manga a hini i lua tala e huriki ri made muga vonga.
29“E rei tara ne mua i ratea tara naro mavuru maea, bara ni tono tala na kabu vona. 30Mu ramai a maka ngava a habi ne mua. Naha ni ramai a maka naro mavuru ne huriki ri made muga vona a malala iea. Mua bara mu ramai a maka naro mavuru nga, bara mu muto na matagu. Mu longo, iau e BAKOVI DAGI a Vure ne mua a taki a ngava nga.”
Copyright information for
BNP